تیره اونۍ د سعودي عربستان په جده ښار کې د او آیی سي، د اسلامي نړۍ د هیوادونو سازمان مهمه غونډه ترسره شوه چې پکې د پاکستان په شمول د نړۍ بیله بیلو هیوادونو استازو ګډون وکړو
ددې غونډې په ترڅ کې د پاکستان او افغانستان د شخړې هوارولو لپاره جوړې شوې د رابطه ګروپ د تخنیکي تیاریو په اړه هم یوه مهمه غونډه تابیا شوې وه
قطر د اسلامي نړۍ د هیوادونو د همکاریو سازمان د افغانستان د رابطه ګروپ د تخنیکي چمتووالي په غونډه کې، چې د سعودي عربستان په جده ښار کې د او آیی سي سازمان په مرکزي دفتر کې ترسره شوه، د افغانستان په اړه د متوازن او ګډو هڅو پر اړتیا ټینګار وکړو
په دې غونډه کې د قطر استازیتوب د بهرنیو چارو وزارت د ځانګړي استازي دفتر لومړي سکرتر خالد عبدالعزیز الخلیفي وکړ
نوموړي وویل، دا ناسته په داسې حساس پړاو کې ترسره کېږي چې یو هراړخیز چلند ته اړتیا لري، داسې چلند چې بیړنی بشري غبرګون، مسوولانه سیاسي ښکېلتیا او د افغانستان ځانګړو شرایطو ته درناوی په کې شامل وي
وې ویل او ټینګار ی وکړو چې د افغانستان شخړې هوارولو لپاره داسې یوه تګلاره اړتیا لري چې د اسلامي همکاریو سازمان د اصولو له مخې او د افغان ولس د سولې او ثبات د هیلو په ملاتړ کې بشپړه شي
هغه زیاته کړه چې دا غونډه د تخنیکي ارزونو د تبادلې، د هڅو د همغږۍ او د عملي سپارښتنو د جوړولو لپاره یو مهم فرصت برابروي، تر څو د اړیکو ډلې وړتیا نوره هم پیاوړې شي او په اغېزمن او منظم ډول خپل رول ترسره کړي
د قطر دې لوړپوړي ډیپلوماټ د ملګرو ملتونو تر مشرۍ لاندې د افغانستان په اړه د دوحې بهیر ته هم اشاره وکړه او دا یې د افغان قضیې په تړاو د نړیوالو هڅو یوه مهمه لاسته راوړنه وبلله، چې د ټولو اړوندو لوریو ترمنځ د خبرو اترو او همغږۍ لپاره یو متحد چوکاټ برابروي