اسلاماباد : د امریکا متحده ایالاتو او پاکستان ترمنځ دوهاړخیزو اړیکو کې په ۲۰۲۵ کال کې د پام وړ ښهوالی راغلی چې همکاري یې د دیپلوماسۍ، امنیت، اقتصادي پراختیا او زدهکړو په برخو کې پراخه شوه
دا خبره د امریکا د سفارت چارژدافیر نټالي بیکر د کال پای په پیغام کې کړې ده
نټالي بیکر په یوه ویډیويي پیغام کې وویل چې شراکت تر بل هر وخت پیاوړی شوی او نږدې همکارۍ عملي پایلې لرلې، لکه د کارموندنې فرصتونه، د خوړو امنیت پیاوړتیا، د ادارو ملاتړ او بشري مرستو کی هم اړیکی زیاتی شوی
هغې زیاته کړه چې امریکایي پانګونو په پاکستان کې د زرګونو دندو په رامنځته کولو کې مرسته کړې او همداراز یې د عدلیې او قانون پلي کوونکو ادارو د اصلاحاتو ملاتړ کړی دی.
هغې وویل چې امریکا د اړتیا پر مهال د پاکستان تر څنګ ولاړه وه، په ځانګړي ډول د موسمي بارانونو (مون سون) د سېلابونو پر مهال، او دواړو هېوادونو د خوندي، مقاوم او سوکاله راتلونکي لپاره خپله ګډه ژمنتیا بیا تایید کړه
۲۰۲۵ کال د لوړې کچې دیپلوماتیکو اړیکو او بیا راژوندۍ شوې امنیتي همکارۍ له امله ځانګړی و. یو مهم پړاو هغه مهال رامنځته شو چې د ۲۰۲۵ کال په جون کې د پاکستان د پوځ مشر، فیلډ مارشل عاصم منیر، سپینې ماڼۍ ته سفر اوکړو
له دې وروسته د ستمبر په میاشت کې د لومړي وزیر شهباز شریف له لوري ګډ سفر ترسره شو، چې دا د واشنګټن او اسلاماباد ترمنځ د اړیکو د بیا تنظیم او د باور د نوې مرحلې نښه وه
امریکا همداراز د سیمې د تاوتریخوالي د کمولو لپاره رول ولوباوه او د ۲۰۲۵ کال په مې میاشت کې یې د هند او پاکستان ترمنځ د پولې د لنډې شخړې پر مهال د اوربند په منځګړیتوب کې مرسته وکړه
پوهان وایی دا پرمختګ د پاکستان د دیپلوماتیک مسیر لپاره یو مهم بدلون وو چې د نړیوالو دیپلوماتیکو کړیو په منځ کې یې دریځ لا پیاوړی کړې
امنیتي همکاري د امریکا–پاکستان د ترهګرۍ ضد خبرو اترو د بیا پیل له لارې نوره هم ژوره شوه، چې پایله یې د واشنګټن له لوري د بلوچستان لبریشن آرمي د بهرنۍ ترهګرې ډلې په توګه نومول وو. پاکستان دغه اقدام یو مهم دیپلوماتیک پرمختګ وباله
په ۲۰۲۵ کال کې اقتصادي همکاري له دودیزو مرستو واوښته او د اوږدمهاله پانګونې پر لور لاړه. د ډسمبر په میاشت کې د امریکا د صادراتو او وارداتو بینک د ریکوډیک د کان کیندنې پروژې لپاره د ۱٫۲۵ میلیارده ډالرو تمویل تصویب کړ، چې تمه ده زرګونه دندې رامنځته کړي او پرمختللې امریکایي ټکنالوژي پاکستان ته راولي.
همداراز د اینګرو سرې جوړولو شرکت لپاره د محلي اسعارو د تمویل یوه جلا طرحه د خوړو امنیت او واړه کرونده ګر پیاوړي کړل
زدهکړې او د خلکو ترمنځ اړیکې هم د دواړو هېوادونو د اړیکو مهمه برخه پاتې شوې. د ډسمبر په ۸مه، نټالي بیکر په اسلاماباد کې د امریکا د تعلیمي بنسټ نوې پنځهپوړیزه ودانۍ پرانسته، چې د فولبرایټ پروګرام د ۷۵ کلونو د پوره کېدو نښه ده. دغه پروګرام تر اوسه له ۹ زرو څخه زیاتو پاکستانیانو ته په امریکا کې د زدهکړو زمینه برابره کړې ده.
د ۲۰۲۵ کال د سېلابونو پر مهال، د امریکا پوځ هدفمندې بشري مرستې، لکه برېښنا جنراتورونه او د اوبو ایستلو پمپونه، پاکستان ته ورسول، چې دا د بشري بحرانونو پر مهال د واشنګټن دوامداره ملاتړ څرګندوي