د افغانستان د عمومي استخباراتو اداری سرچینو ویلي، چې د بدخشان په شمال ختیځ ولایت کې پر چینايي وګړو د وروستي برید په تړاو تر دوو درځنو زیات مشکوک کسان نیول شوي دي
د سرچینو په وینا، د پېښې له رامنځته کېدو وروسته د استخباراتي عملیاتو پر مهال شاوخوا له دوو درځنو څخه زیات کسان نیول شوي دي. که څه هم د نیول شوو کسانو ډېری لا هم تر پلټنو لاندې دي، خو یو محدود شمېر تر لومړنیو څېړنو وروسته خوشې شوي، ځکه چې پر هغوی د برید په تړاو کوم کره شواهد ونه موندل شول
یاد برید، چې د ډرون په وسیله تیره میاشت ترسره شوی، په سیمه کې یې جدي امنیتي اندېښنې راولاړې کړې، په ځانګړي ډول د چینايي وګړو او پروژو د شتون له امله اندیښنې زیاتې شوی دی
که څه هم د مرګ ژوبلې په اړه تر اوسه کوم رسمي شمېر نه دی خپور شوی خو ازادو سرچینو ویلی وو چی په مختلفو بریدونو کې پنځه چینایان وژل شوی له پېښې وروسته په بدخشان کې د بهرنیو ګټو او مهمو تاسیساتو امنیتي تدابیر سخت شوي دي
د همدې سرچینو له قوله، د تاجکستان د امنیتي ادارو له لوري هم پلټنې شوې دي. او د تاجکستان موندنې ښيي چې د یاد برید لپاره کارول شوی ډرون د افغانستان له خاورې چمتو او والوزول شوی، چې له دې سره هغه اوازې رد کېږي چې برید له پولې اخوا تنظیم شوی و
بدخشان، چې له تاجکستان او د چین د شینجیانګ سیمې سره ګډه پوله لري، د خپل غرني جغرافیې، پرانیستو پولو او ستراتېژیک موقعیت له امله یوه حساسې سیمه بلل کېږي. په وروستیو کلونو کې، د وسله والو فعالیتونو او د بهرنیو وګړو، په ځانګړي ډول د چینايي کارکوونکو د خوندیتوب په اړه، په دې ولایت کې امنیتي پاملرنه زیاته شوې ده
امنیتي چارواکو ویلي چې پلټنې لا هم روانې دي او استخباراتي ادارې هڅه کوي د برید د همکارانو او احتمالي پولې پورې اړوندو اړیکو پېژندنه وکړي. تر اوسه د برید پړه پر کومې ځانګړې ډلې نه ده اچول شوې، خو چارواکي وايي چې د نورو نیونو امکان هم شته
دغه پرمختګونه په داسې حال کې رامنځته کېږي چې په سیمه کې د بهرنیو ګټو پر ضد د بریدونو د مخنیوي لپاره ګډې هڅې روانې دي او ګاونډیو هېوادونو ته دا پیغام ورکول کېږي چې افغانستان به اجازه ورنه کړي چې خاوره یې د دښمنانه فعالیتونو لپاره وکارول شي