اسټرالیا سډني کې پر یهودانو خونړی برید: د مړو تعداد ۱۶ ته رسیدلې

 د اسټرالیا د سیډني ښار په بونډي بېچ سیمه کې د یهودانو پر یو مذهبي مراسمو شوی خونړی برید کی لږ تر لږه ۱۶ کسان وژلي شوی او شاوخوا ۴۰ نور یې ټپیان کړي دي، چې په هغوی کې د پولیسو دوه افسران هم شامل دي

 اسټرالیايي چارواکو دا پېښه د یکشنبې په ورځ تایید کړې ده

د رویټرز خبري ایجنسی د راپورټ  تر مخه برید د پلار او زوی له‌خوا ترسره شوی دی. پولیس وايي پلار د پېښې په ځای کې وژل شوی، خو زوی یې په ټپي حالت کې روغتون ته لېږدول شوی دی. د بریدګرو هویت تر اوسه په رسمي ډول نه دی څرګند شوې

یاد برید د یهودانو د حنوکه مذهبي مراسمو پر مهال شوی، چې د ,,رڼا جشن،، په نوم هم پېژندل کېږي او ګڼ شمېر ګډونوال یې د بوندي بېچ دې سیاحتي سیمې ته راټول کړي وو. عیني شاهدان وایی د ډزو له پیل سره سم خلک په ویره کې وتښتېدل او سیمه د څو شېبو لپاره د ګډوډۍ ښکار شوه

بیړنیو مرستندویه ټیمونو پراخه عملیات پیل کړل او ټپیان یې د سډني بېلابېلو روغتونونو ته ولېږدول. پولیسو سیمه کلابنده کړه او اعلان یې وکړ چې دا مهال د نورو شکمنو کسانو پلټنه نه کېږي

د چارواکو غبرګون

اسټرالیايي پولیسو ویلي، د برید د ابتدایی معلوماتو لپاره پلټنې روانې دي او تر اوسه کومې ډلې د دې پېښې مسوولیت نه دی منلی

د اسټرالیا صدراعظم انتوني البانېزي برید په کلکه غندلی او دا یې یو ظالمانه ، ترهګریز بریدو او یو ناوړه عمل بللې دې  

نوموړي د قربانیانو له کورنیو سره خواخوږي ښودلې او چارواکو د یهودانو د ټولنې پر مرکزونو، عبادت‌ځایونو او عامه غونډو امنیت سخت کړی دی

دا برید په داسې حال کې شوی چې د غزې جګړې له امله نړیوال کړکېچ زیات شوی او ورسره په بېلابېلو هېوادونو کې د یهودانو پر وړاندې د کرکې او بریدونو پېښې هم ډېرې شوې دي. په تېرو دوو کلونو کې په ګڼو هېوادونو کې د یهودانو پر مذهبي مراسمو او ټولنو د تاوتریخوالي راپورونه ورکړل شوي دي اسټرالیايي چارواکو ټینګار کړی چې څېړنې به دوام ولري او له خلکو یې غوښتي چې تر رسمي معلوماتو وړاندې له اټکل او اوازو ډډه وکړي

نورخبرونه: په اسټریلیا کې د بونډي ساحل د ډزو پېښه: د پاکستاني وګړي د لاس لرلو ادعاوې ناسمې ثابتې شوې