پېښور : وفاقي د پلټنو ادارې (ایف آی اې) د حواله هُنډۍ پر ضد په پراخه عملیاتو کې دوه کسان نیولي او له هغوی څخه یې کروړونه نغدي پیسې هم برامد کړي دي
د ایف آی اې د ویاند په وینا، دا عملیات د ډي جي ایف آی اې په لارښوونه د ایف آی اې د پېښور زون له خوا ترسره شوي، چې پکې د کمرشل بینکنګ سرکل پېښور او د کمپوزېټ سرکل ایبټ آباد ګډ ګډون درلود
د ویاند له مخې، نیول شوي کسان عبدالله او محمد ندیم نومېږي. عبدالله له سوات چکدرې او محمد ندیم له بټګرام څخه نیول شوی دی. دواړه کسان د حواله هُنډۍ په غیر قانوني کاروبار کې ککړ وو
ایف آی اې ویلي چې د عبدالله له ولکې څخه یو کروړ او دوه لکه روپۍ او د محمد ندیم له ولکې څخه درې لکه روپۍ ترلاسه شوې دي
اداره وايي له دواړو کسانو څخه موبایل تلیفونونه او د حواله هُنډۍ اړوند مهم شواهد هم نیول شوي دي
د ایف آی اې د ویاند په وینا، نیول شوي کسانو څخه د ترلاسه شوو پیسو په اړه چارواکي مطمین نه کړل، چې له امله یې هغوی نیول شوي او پر ضد یې رسمي پلټنې پیل شوې دي
ادارې زیاته کړې چې د نیول شويو کسانو د نورو همکارانو د نیولو لپاره په بېلابېلو سیمو کې چاپې وهل کېږي او د حواله هُنډۍ د شبکې د بشپړ له منځه وړلو لپاره عملیات دوام لري
حواله هنډي او د نشه ی توکو کاروبار
دا مهمه ده او باید دلته ی یادونه وشی چې د غیرقانوني کاروبار حواله هنډي کې ککړو کسانو اړیکې له نړیوالو نشه ی توکو کاروبار کووونکو سره وی او هم دای پیسې دوی یو هیواد څخه بل هیواد ته استوي چې له امله ی په نړیواله کچه پاکستان بدنام شوې دې ځایی خلک غوښتنه کوي چې دې غیرقانوني کاروبار او د نشه ی توکو په کاروبار کې ککړو کسانو پر ضد دې ملکي ادارې سخت ګامونه پورته کړي ترڅو پاکستان په نړیواله کچه له بدنامیدلو بچ کړي