اسلاماباد : پاکستان د هند د بهرنیو چارو وزیر ایس. جې شنکر تازه څرګندونې سخته لمسوونکې، بېاساسه او غیرمسؤلانه وبللې او په کلکه یې وغندلې
د بهرنیو چارو وزارت په یوه رسمي اعلامیه کې ویلي چې هند د پاکستان پوځ په نښه کولو ته هڅې کوي، او دا ټول د یوې لویې دروغجنې پروپاګنډۍ برخه ده.
د اعلامیې له مخې، د دغې پروپاګنډي شبکې شواهد د اروپايي اتحادیې د ډيساینفو لېب د څېړنو په ترڅ کې بربنډ شوي دي. د اي یو ډیس انفو لیب راپور ښيي چې له ۲۰۰۵ کال راهیسې د هند له لوري د ۱۱۶ هېوادونو په منځ کې ۷۵۰ جعلي رسنۍ، له ۵۵۰ ډېرې ویبپاڼې، جعلي هویتونه، او د اروپايي ټولنې او ملګرو ملتونو پورته شوي نومونه کارول شوي څو د پاکستان پر ضد همغږې ناسمې خبرې خپرې کړي
د بهرنیو چارو وزارت ویاند طاهر اندرابې وویل ,,پاکستان په صفا ډول د هند د بهرنیو چارو وزیر لمسوونکې، بېاساسه او غیرمسؤلانه څرګندونې ردوي او غندي، نوموړي زیاته کړه چې دا څرګندونې د پاکستان د ادارو د بدنامولو او د سیمې د ګډوډۍ څخه د هند د کړنو د پټولو هڅه ده
هند غواړي د خپلو سیمیزو کړنو توجه واړوي
اندرابې په خپلو څرګندونو کې وویل چې پاکستان یو مسؤل هېواد دی او ټول دولتي بنسټونه یې، په ځانګړي ډول پوځ، د ملي امنیت د ستنو په توګه د هېواد د حاکمیت او سرحدي بشپړتیا د ساتنې لپاره کار کوي
ویاند زیاته کړه چې د ۲۰۲۵م کال په مې میاشت کې رامنځته شوې نښته یو ځل بیا ثابته کړه چې د پاکستان وسلهوال ځواکونه د هر ډول هندي تېریو پر وړاندې مسلکي، مؤثر او مسؤل چلند لري. ٫٫هیڅ ډول پروپاګنډه د دې حقیقت پرده نه شي اچولی
نوموړي دا هم وویل چې د هند مشرتابه د پاکستان د ادارو د بدنامولو هڅه کوي څو د سیمې د بېثباته کولو په برخو کې خپلې کړنې پټې کړي او په پاکستان کې د هند په مالي ملاتړ له روانې ترهګرۍ څخه د خلکو توجه واړوي
هند دې د خپلې هندوتوا توندلارې تګلارې ته کتنه وکړي
په اعلامیه کې په توند ټکو ویل شوي ,,هند باید د هندوتوا د فاشیستي او توندرو تګلارې په اړه ژوره څېړنه وکړي، کومه چې د د هولو ټکولو ، د جسماني تشدد ، ناوړه بندیزونو، او د عبادت ځایونو د ویجاړولو لړۍ پرمخ وړي
اعلامیه کې په پای کې ویل شوي چې پاکستان د ګډ ژوند، خبرو اترو او دیپلوماسۍ په اصل باور لري، خو په خپلو ملي ګټو، حاکمیت او دفاع کې متحد، ثابت او کلک ولاړدې