واشنګټن — د نومبر په ۲۶مه، د واېټ هاوس د وداني څخه دوه بلاک لرې د ډزو په پیښه کې د ملي ګارډ ۲۰ کلنه ساره بیکستروم، چې د ویسټ ورجینیا اوسېدونکې وه، د زخمونو له امله مړه شوه، او د هغې څلورویشت کلن ملګری اندرو وولف لا هم په نازک حالت کې دی.
امریکايي چارواکو بریدکوونکی ۲۹ کلن افغان وګړی رحمان الله لګهنوال په توګه معرفي کړی، چې په سپتمبر ۲۰۲۱ کې امریکا ته داخل شوی و. د واشنګټن ډي سي اټارني جنرال جینین پیرو په وینا، لګهنوال له واشنګټن ایالت څخه پلازمینه ته په ښکاره هدف سره سفر کړی و څو په مرکزی ځواکونو برید وکړي.
د برید تفصیل
چارواکي وایي، پېښه شاوخوا ۲:۱۵ دقیقې رامنځته شوه، کله چې بریدکوونکي د “.357 سمیته او ویسن” وسله وکاروله او پر ګزمې ولاړو سرتېرو ډزې وکړې. لګهنوال لومړی بیکستروم وویشتله او ور پسې یې څو ګولۍ پر وولف هم وچلول. دواړه سرتېري د ویسټ ورجینیا د ملي ګارډ له لوري څو میاشتې مخکې د واېټ هاوس د امنیت لپاره ګمارل شوي وو.
برید کوونکی پیژندنه
د FBI مشر کاش پټیل دغه پېښه د فدرالي قانون پلي کوونکو پر ضد برید بللی او ویلي یې دي چې پراخه تحقیقات روان دي. راپورونه وایي، رحمان الله لګهنوال د افغانستان په کندهار کې له هغه ځانګړي واحد “زیرو یونټ” سره تړاو درلود چې د CIA له استخباراتي ملاتړ سره د طالبانو او داعش د ځپلو ماموریتونه ترسره کول. CIA بیا د مستقیمې همکارۍ خبره رد کړې، خو اعتراف یې کړی چې په استخباراتو او لوژستیکي برخه کې یې مرسته کړې ده.
میګریشن او استوګنې معلومات
رحمان الله لګهنوال په ۲۰۲۱ کال کې د “Operation Allies Welcome” پروګرام له لارې امریکا ته داخل شوی و او په اپرېل ۲۰۲۵ کې یې سیاسي پناه هم ترلاسه کړې وه. د برید اصلي انګیزه لا هم څېړل کېږي.
د امریکا د مشرانو غبرګون
ولسمشر ډونالډ ټرمپ د شکرانې د ورځې په خبری وینا کې د ساره بیکستروم مړینه تایید کړه او وویل چې هغې د ۲۰۲۳ راهیسې د ملي ګارډ په چوکاټ کې صادقانه خدمت کاوه. نوموړي د ټپي سرتېري د ژغورنې لپاره د ټولو ممکنه هڅو د دوام ژمنه هم وکړه.
قانوني او امنیتي اغېزې
د برید وروسته، د امریکا د کډوالۍ ادارو اعلان کړی چې د “د اندېښنې هېوادونو” د وګړو د ګرین کارډ قضیې به له سره جدي وڅېړل شي. دا پرېکړه وروسته له هغې شوې چې څرګنده شوه بریدکوونکی د ۲۰۲۱ د بیا میشتېدو پروګرام لاندې امریکا ته راغلی و. چارواکي وایي، که دواړه سرتیري په ځای کې وژل شوي وای، نو لګهنوال به د قتل لومړۍ درجې تور سره مخ کېده او د مرګ سزا امکان یې هم موجود و.
پلټنې روانې دي
امنیتي ادارې خلکو ته غږ کړی چې که د پېښې په اړه کوم معلومات لري، له چارواکو سره دې شریک کړي