استرالیا د ایران د اسلامي انقلاب ساتونکي ځواک سپاه پاسداران انقلاب اسلامي په رسمي توګه د ترهګرۍ د ملاتړ کوونکي دولت په توګه اعلان کړی. دا د هغه نوي قانون لومړۍ فهرستسازي ده چې د دولتپلوه ترهګرۍ د مخنیوي لپاره تصویب شوی دې
دغه پرېکړه د ۲۰۲۵م کال د نومبر ۲۷مه وروسته له هغه وشوه چې د اسیو ارزونې وښودله چې سپاه پاسداران د ۲۰۲۴م کال په اکتوبر کې په سېډني کې د لوئس کانټینینټل کېچن پر ریستورانت او د همدې کال په دسمبر کې په مېلبورن کې د اداس اسراییل کنیسه بریدونه تنظیم کړي وو. چارواکي وايي دا بریدونه د یهودي استرالیایانو د وېرولو او د ټولنې د وېشلو لپاره ترسره شوي وو
پارلمان تر دې وړاندې د کال ۲۰۲۵ د ریاستي ادارو لوري د ترهګرۍ قانون منظور کړی چې حکومت ته اجازه ورکوي د هغو بهرنیو دولتي ادارو پر ضد اقدام وکړي چې د ترهګرۍ ملاتړ کوي
د استرالیا د حکومت دریځ
د کورنیو چارو وزیر ټوني برک وايي چې دا فهرستسازي د استخباراتي او امنیتي ادارو د مشورو پر بنسټ شوې ده. د جزا قانون د اې ۵.۳ مادې له مخې د سپاه پاسداران ملاتړ، روزنه، غړیتوب، تمویل او یا ورسره اړیکه اوس دروند جرم ګڼل کېږي او تر ۲۵ کلونو قید سزا لري
د بهرنیو چارو وزیرې پېني وونګ ویلي چې د سپاه پاسداران بریدونه په استریلیا کې “بېساري او خطرناک دښمنانه عمل و، او البانېز حکومت د ایران پر ضد تر هر وخت ډېر سخت اقدامات کړي دي
لویې وکیلې میشل رولینډ ټینګار کړی چې نوې قانوني اصلاحات به د استریلیا د ضدترهګرۍ قوانین لا قوي کړي
د ایران پاسداران ترهګر ګرځولو وروسته د ایران غبرګون
ایران دغه اقدام په کلکه غندلی او د استرالیا پرېکړه یې “غیرقانوني، خطرناک او سیاسي هڅه” بللې ده. د ایران د بهرنیو چارو وزارت څرګندونې کوي چې دا اقدام د نړیوالو قوانینو او د دولتونو د حاکمیت خلاف دی
تهران په استرالیا تور پورې کړی چې د “صهیونيستي رژیم” د فشار له امله یې دا پرېکړه کړې، او ټینګار یې کړی چې سپاه پاسداران د ایران د رسمي پوځ برخه ده چې د هېواد د دفاع مسؤلیت لري
ایراني چارواکو ګواښ کړی چې د سپاه پاسداران د حیثیت د ساتنې لپاره به “ټول لازم اقدامات” وکړي
امنیتي سپارښتنه
د استرالیا چارواکي له خلکو غواړي چې هر ډول شکمن فعالیت د ملي امنیت ځانګړې کرښې ۱۲۳ ۴۰۰ ۱۸۰۰ ته راپور کړي، ځکه استریلیا له خپلو نړیوالو شریکانو سره د نړیوالې ترهګرۍ او تاوتریخوالي پر ضد ګډې هڅې روانې ساتي
