د قطر او ترکیې په منځګړیتوب د پاکستان او افغان طالبانو ترمنځ د استنبول درېیم پړاو خبرې بې له کوم پاموړ پرمختګ څخه پای ته رسېدلې دي. د باوري سرچینو په وینا، د پاکستان پلاوی له مذاکراتي ځایه روان شوی او د هېواد د بېرته تګ په موخه هوایي ډګر ته رسېدلی دی.
د سفارتي سرچینو له قوله، پاکستان تمه لري چې د روانو خبرو بهیر به دوام ومومي، څو د اوسني بنبست ماتېدو ته زمینه برابره شي.
سرچینې وايي، د خبرو دغه بنبست د طالبانو د غیرمنطقي او نهعملي وړاندیزونو له امله رامنځته شوی، چې له کبله یې خبرې کومو نتیجو ته ونهرسېدې. د پاکستان پلاوي د خبرو پر مهال یوازینی غوښتنه دا وه چې د تحریک طالبان پاکستان (TTP) پر ضد د اقدام لپاره د افغان طالبانو له خوا لیکلې ضمانت ورکړل شي، خو د افغان رجیم لهخوا د دې غوښتنې د منلو چمتووالی ونهښودل شو.
د خبرو له ناکامېدو وروسته، وزیراعظم شهباز شریف د مرکزی کابینې بیړنۍ غونډه راوغوښتله، چې تمه ده له باکو څخه د ویډیو لینک له لارې مشري یې وکړي. د دفاع وزیر خواجه آصف د خبرو د ناکامۍ پخلی وکړ او ویې ویل، پاکستان هر ممکن هڅه وکړه، خو د افغان لوري چلند رغوونکی نه و.
د پاکستان چارواکو ټینګار وکړ چې نړیواله ټولنه باید د افغانستان موقتي حکومت وهڅوي څو د ۲۰۲۰ کال د دوحې تړون دوه اساسي ژمنې عملي کړي – یو دا چې د افغانانو ترمنځ سیاسي خبرې پیل کړي، او بل دا چې د افغانستان خاوره د هغو ډلو یا افرادو لهخوا د نورو هېوادونو پر ضد د فعالیت لپاره ونهکارول شي.
د اطلاعاتو مرکزی وزیر عطاالله تارړ د ترکیې او قطر د منځګړیتوب هڅې وستایلې، خو ټینګار یې وکړو چې مسؤلیت د افغانستان پر موقتي حکومت دی، کوم چې تر اوسه د ترهګرۍ د مخنیوي په برخه کې خپلې سیمهییزې او نړیوالې ژمنې نه دي پوره کړي.
تارړ زیاته کړه، پاکستان د افغان ولس پر وړاندې هېڅ دښمني نه لري، خو د طالبانو هغه تګلارې به هېڅکله ونهمنل شي چې د افغانستان د خلکو او یا ګاونډیو هېوادونو په زیان وي. نوموړي یو ځل بیا ټینګار وکړ چې پاکستان به د خپل حاکمیت او د خپل ولس د امنیت د ساتنې لپاره هره ضروري لار خپله کړي.
د حکومتي سرچینو په وینا، د راتلونکو ګامونو د ټاکلو لپاره د لوړې کچې سلا مشورې روانې دي، او تمه ده په راتلونکو ورځو کې نور جزیات څرګند شي.