د افغانستان اسلامي امارت د پاکستان ، روس، چین او ایران له هغه دریځ هرکلې دې چې پکې یې په افغانستان کې د هر ډول بهرنيو پوځي اډو د جوړېدو مخالفت کړې دې. .
د امارت اسلامي افغانستان مرستیال ویاند حمدالله فطرت په خپل تازه بیان کې ویلي دي چې د افغانستان خاوره به د کوم بل هېواد پر ضد د کارولو لپاره اجازه ور نه کړې شي او نه په هېواد کې کوم وسلهوالې ډلې ته د فعالیت اجازه ورکړل شوې ده. نوموړي هغه اندېښنې بېاساسه وبللې چې ګواکې له افغانستان څخه نورو هېوادونو ته ګواښ دی. د ده په وینا، امارت اسلامي افغانستان د فساد، نشه يي توکو او هر ډول ناوړه چارو پر ضد جدي اقدامات کړي او دا خپل اساسي مسؤلیت ګڼي چې پر مخ ی وړي. .
حمدالله فطرت روښانه کړه چې امارت اسلامي غواړي له ټولو هېوادونو سره د متقابل درناوي پر بنسټ مثبتې اړیکې ولري. د هغه په باور، دا یو واقعي او حقیقتمحور لیدلوری دی چې د افغانستان د امنیت، ثبات او پرمختګ په رڼا کې د سیمه ییزو او نړیوالو هېوادونو سره اړیکو ته لومړیتوب ورکړل شي. هغه زیاته کړه، د کابل تګلاره د متقابل باور، مثبتو اړیکو او دوستانه فضا پر پراختیا ولاړه ده او د افغانستان په اړه ناسمې اندېښنې او بېبنیاده تورونه په کلکه ردوي.
سیاسي شنونکي باور لري چې د سیمې د هېوادونو لخوا د افغانستان د ثبات ملاتړ د امارت اسلامي لپاره مهم فرصت دی چې له مخې یې خپلې سیاسي او اقتصادي اړیکې لا ټینګې کړي. د دوی په وینا، د کابل له لوري د ګاونډیو هېوادونو اندېښنو ته مثبت ځواب ویل د باور جوړونې بهیر پیاوړی کولی شي.
یاده پرمختیا په داسې وخت کې رامنځته شوې چې روس، چین، ایران او پاکستان په وروستیو کې د افغانستان په اړه ګډ څلور اړخیزه اعلامیه خپره کړه. په اعلامیه کې ټینګار شوی و چې د افغانستان د ستونزو د حل لپاره سیمه ییز جوړښتونه، په ځانګړي ډول “د مسکو فارمیټ” او “د شانګهای همکارۍ سازمان”، مهم رول لوبولی شي. دلته باید یادونه وشی چې د پاکستان، روس، چین او ایران ګډ دریځ نه یوازې د امارت اسلامي افغانستان لپاره یو دیپلوماتیک ملاتړ کېدای شي، بلکې په سیمه کې د سولې، ثبات او همکارۍ نوې لارې هم پرانیستلی شي .
نورخبرونه
د جماعت اسلامي پاکستان پلاوي پلازمینه کابل کې متقي سره مهمه لیدنه
د افغانستان خاوره به هیڅ کله هم د پاکستان په ضد و نه کارول شي: حمدالله فطرت