Skip to content 
د سعودي عرب ستر مفتی، شیخ عبدالعزیز بن عبدالله آل الشیخ، له دې نړۍ سترګې پټې کړې.
شیخ عبدالعزیز بن عبدالله آل الشیخ له څه مودې راهیسې ناروغ وو. نوموړی د ۱۹۴۳م د نومبر پر ۳۰مه د مکې مکرمې په ښار کې زېږېدلی و.
د سعودي عرب ستر مفتی د علماوو د شورا امیر هم پاتې شوی دی. شیخ عبدالعزیز بن عبدالله آل الشیخ ته د حج د خطبو د زیات شمېر وړاندې کولو ویاړ هم ورپه برخه شوی و.
د ګلف نیوز د راپور له مخې، د سعودي شاهي ماڼۍ اعلان کړی چې د سعودي عرب ستر مفتی، شیخ عبدالعزیز بن عبدالله آل الشیخ، د ۸۲ کلونو په عمر کې وفات شوی دی.
د سرکاري اعلامیې له مخې، د خادم حرمین شریفین، پاچا سلمان بن عبدالعزیز په حکم، د شیخ عبدالعزیز آل الشیخ لپاره د جنازې غایبانه لمونځ نن د مازیګر له لمونځ وروسته د مسجد الحرام (مکه مکرمې)، مسجد نبوي (مدینې منورې) او د مملکت په ټولو جوماتونو کې ترسره کېږي. سربېره پر دې، د ریاض په امام ترکی بن عبدالله جومات کې هم نن د مازدیګر له لمانځه وروسته د شیخ آل الشیخ د جنازې لمونځ ادا شو.
