وزيراعظم شهباز شريف د بيجنګ په ګريډ هال آف دي پيپلز کښې د چين د صدر شي جن پنګ سره ليده کاته کړيدي،دواړو مشرانو د پاکستان او چين اړيکو پراختيا،سي پيک فيز ټو منصوبې،تجارت،سرمايه کارۍ بشمول نورو شعبو کښې همکاريو او د سيمې سيکيورټۍ په معاملو خبرې کړيدي ۔ وزير اعظم شهباز شريف د شنګهائي تعاون تنظيم د مشرانو د اجلاس په کامياب انعقاد او د فاشيزم په ضد نړي والې جهګړې د ۸۰ کليزې په موقع د چين صدر له مبارکي ورکړيده ۔وزيراعظم شهباز شريف په دې موقع ووئيل چې د چين پرمختګ او د جديد دور د ترقۍ منزلونه سر کولو کښې د شي جن پنګ د سياسي بصيرت او قيادت ډير لوئې لاس دے د چين په دې کاميابو پاکستان وياړ کوي او چين سره د پاکستان د اوږد مهال د ملګرتيا او د ورورلۍ رشته قائم پاتې کيدل زمونږ لپاره لوئې اعزاز دے ۔دواړو مشرانو په منطقه او نړۍ په سطح رامخې ته شوي واقعاتو او پرمختګونو په معاملو هم تفصيلي خبري کړيدي او وزيراعظم شهباز شريف د پاکستان د خپلواکۍ،معاشي پرمختګونو او د سيمي امنيت لپاره د پاکستان مسلسل ملاټر جاري ساتلو او په اهمو معاملو د پاکستان د موقف تائيد کولو باندې د چين د حکومت اقداماتو ستائينه کړې او شکريه ئې ادا کړيده ۔ ملاقات دوران د چين صدر شي جن پنګ پاکستان سره اړيکې نورې هم مضبوطولو د عزم اظهار کړېدے او پاکستان ئې د چين مهم شراکت دار او باوري ملګرې ګرځولې دے ۔ شي جن پنګ زياته کړيده چې سي پيک منصوبه دوئمه مرحله کښې داخل شويده د دې منصوبې لاندې د پاکستان په مهمو اقتصادي شعبو د چين ژور نظر دے او د اقتصادي پرمختګ په ټولو شعبو کښې به چين د پاکستان هر قسم مرسته جاري ساتي ۔ ملاقات په مهال دواړو مشرانو اتفاق کړېدے چې د پاکستان او چين د تعلقاتو ۷۵ کليزه به ښه په جوش او جذبې سره نمانځلي شي ، وزيراعظم د چين صدر شي جن پنګ له د پاکستان د دورې بلنه هم ورکړيده ۔ فيلډ مارشل عاصم منير او وفاقي وزيران هم په دې ملاقات کښې موجود وو