بټګرام : د يو ځايي اوسېدونکي د پټې اطلاع پر بنسټ، د بټګرام مرستیال کمشنر په لارښوونه د اېډيشنل اسسټنټ کمشنر اختر رسول په مشرۍ یو مهم عملیات ترسره شول. دغه کارروایي د کوزه بانډه په سيمه کې وشوه چېرته چې يو تازه حلال شوی خر او د خره غوښه ونيول شوه
د انتظامیه افسرانو ددې غیرمعیاري او ناقانونه کاروبار په ضد د اپریشن ویډیو هم په سوشل میډیا مخې ته راغلې ، په ویډیو کښې ښکاري چې یو خر تازه حلال شوې او غوښه ی پرته ده
د رپورټ له مخې، په پېښه کې ککړ دوه کسان پر ځای ونیول شول او پوليسو ته وسپارل شول، په داسې حال کې چې ضبط شوې غوښه سمدستي له منځه يووړل شوه
د ضلعې انتظاميې د معلوماتو له مخې، پر تورنو کسانو مقدمه ثبت شوې ده او پلټنې پيل شوې دي، څو د دې ناقانونه کار شاته موجوده شبکه ښکاره شي
اېډيشنل اسسټنټ کمشنر اختر رسول وويل، چې د ولس د صحت سره لوبې کوونکي د هېڅ ډول رعایت مستحق نه دي، او پر ضد به يې سخته قانوني کاروایی ترسره کېږي
ضلعي ادارې زياته کړه، چې په ټول بټګرام ضلع کې به د خوندي او معياري خوراک لپاره مسلسل عمليات دوام ولري
عوام ته هم اپيل شوی چې که د کوم غير قانوني فعاليت، په ځانګړې توګه د جعلي يا صحت ته زیان رسوونکو خوړو د جوړولو يا خرڅلاو معلومات ولري، نو ژر تر ژره دې انتظاميه يا پوليسو ته خبر ورکړي، څو وخت په وخت قانوني ګامونه پورته شي
د بټګرام پوليسو له خوا د دې پېښې په تړاو د دوو تنو پر ضد مقدمه درج شوې ده، چې پيژندګلوي يې د هنزه اوسېدونکی انور شاه د احوال شاه زوی او د مانسهرې اوسېدونکی دانيال د شوکت زوی په نوم شوې ده
د خیبر پښتونخوا ځآیی اولس هم له انتظامیه او پولیسو داسې غوښتنه کړې چې د غوښې کاروبار کوونکو کسانو دې نزدې څارنه وشي او که څوک هم دې ناقانونه کار کښې ککړ وي نوی دوی سره دې هیڅ کوم رعایت و نه شي او دوی په ضد دې سخته قانوني کاروایی وشي