امريکې د منطقې امنيت لپاره د پاکستان د کردار ستائينه کړې،
دوه اړخيزه تجارت،سرمايه کارۍ ته وده ورکول او رابطې سيوا کولو فيصله
د پاکستان او امريکې د خارجه وزيرانو ملاقات کښې دوه اړخيزه اړيکو،تجارت،سرمايه کارۍ او نورو شعبو کښې د همکارۍ په معاملو خبري شويدي او دوه اړخيزه تعاون نور هم مضبوطولو باندې زور راوړلي شوېدے ۔ دواړو مشرانو د ترهه ګرۍ خلاف روان جنګ،د سيمې او نړۍ په صورتحال هم خبرې کړيدي،امريکني خارجه وزير مارکو روبيو د ترهه ګرۍ خلاف په جنګ کښې د پاکستان د قربانو اعتراف کړے، وئيلي ئي دي چې پاکستان د سيمې او نړۍ د امنيت او څوکالۍ کښې تل مهم کردار لوبولې دے۔ خارجه وزير د پاکستان خلاف د هند جارحيت او د هغې وروستو پيدا شوي صورتحال نه خپل هم منصب خبر کړېدے او د دواړو ملکونو ترمينځ د جنګ بندۍ کوشش کولو باندې ئې د صدر ټرمپ هلې ځلې ستائيلي دي ۔ د دواړو خارجه وزيرانو ترمينځ دا وړومبې ملاقات وو دې نه مخکښې دواړو مشرانو ترمينځ به د ټيلي فون د لارې رابطې کيدې ۔ د امريکې نور چارواکي هم دې ملاقات کښې موجود وو۔
امريکه پاکستان سره اړيکې ښه کول غواړي
د پاکستان او امريکې د خارجه وزيرانو په دې مهم ملاقات کښې د نورو موضوعاتو نه علاوه د دواړو ملکونو ترمينځ تجارت او اقتصادي رابطو ته وده ورکولو په معاملو هم د خيالاتو بدلون شوېدے ۔ اسحاق ډار په دې موقع ووئيل چې د پاکستان معيشت د پرمختګ په لور روان شوېدے د نړۍ ملکونو سره تجارتي تعاون په معاملو خبرې روانې دي د امريکې سرمايه کارو له بلنه ورکوؤ چې پاکستان کښې د سرمايه کارۍ د موقعو نه فائده پورته کړي ۔ دواړو وزيرانو کرکيله، معدنيات او ټيکنالوجۍ بشمول نورو شعبو کښې تعاون باندې اتفاق کړېدے ، مارکو روبيو او اسحاق ډار د پاکستان او امريکې ترمينځ د تجارتي معاهدې لپاره روان مذاکراتو باندې د اطمينان اظهار کړيدے او وئيلي ئي دي چې د علاقائي امن او څوکالۍ په حواله د دواړو ملکونو مفادات مشترکه دي د دې لپاره ضروري ده چې د دواړو ملکونو ترمينځ دې ښه تعلق قائم وي،په حکومتي او اولسي سطح دې د رابطو او ملاقاتونو د نوې سلسلې آغاز
اوشي ۔ د پاکستان او هند ترمينځ تاؤ تريخوالي او منطقه کښې رامخې ته شوي واقعاتو او پرمختګونو په تناظر کښې د پاکستان او امريکې د خارجه وزيرانو دا ملاقات خصوصي اهميت لري ،پاکستان د ترهه ګرۍ خلاف جنګ کښې د امريکې يو باوري شراکت دار دې امريکني چارواکو څو وارې د پاکستان د دې کردار ستائينه کړيده،د خارجه وزير اسحاق ډار د واشنګټن دورې نه مخکښې فيلډ مارشل عاصم منير هم د امريکې دوره کړې وه او صدر ډونلډ ټرمپ د هغه په درناوے کښې د دعوت اهتمام هم کړي وو ۔ امريکني صدر ټرمپ هم په مختلفو موقعو د سيمې د امن او استحکام او د ترهه ګرۍ د خاتمے لپاره د پاکستان کردار ستائيلي دے ۔