معرکه حق آپريشن کښې غاښ ماتي شکست او په سفارتي کچ پاکستان په نړۍ کښې يواځې کولو په حواله کوششونه ناکامه کيدو نه پس د هند واکمنو په ميډيا د پاکستان خلاف منفي پروپګنډا شورو کړيده ۔ نوي دلي کښې يوې دستورې ته وينا په مهال د هند چيف آف ډيفنس سټاف جنرل انيل چوهان تور لګولې دے چې پاکستان د چين په مرسته د هند خلاف جوابي کارروائي کړي وه ولې په دې حواله شواهد نه لرو ۔ انيل چوهان وائي چې پاکستان جنګي سامونه او الوتکې د چين نه اخلي او د پنځه کالو دوران ئې 80 فيصد پورې وسله او نور پوځي سامانونه د چين نه درآمد کړيدي ۔انيل چوهان د پاکستان،چين او بنګله ديش ترمينځ اتحاد د هندلپاره خطره ګرځولي ده، انيل چوهان خبردارې ورکړيدے که چرې د دې درې واړو ملکونو ترمينځ سټريټجکي تعاون وشو نو دا به د هند په سيکيورټۍ ډير لوئې اثر پريباسي ۔
پاکستان خلاف بيان بازي او باهمي اختلافات
د هند حکومتي واکمن د پاکستان خلاف بيان بازۍ کښې هم په يو صلاح نه دي، يو حکومتي مشر که يو شان بيان ورکړي نو د بل حکومتي يا پوځي مشر بيان د هغه بيان نه مخالف وي ۔ څو ورځې وړاندې د هند ډپټي آرمي چيف ليفټنټ جنرل راهول يوې دستورې ته وينا په وخت وئيلي وو چې پاکستان د جوابي کارروائيو لپاره د چين نه مرسته ترلاسه کړي وه او د پاکستان جنګي الوتکو چې کوم هدفونه ويشتلي وو د هغه تصويرونه او نور معلومات پاکستان د چين د سيټلائټ نه ترلاسه کړي وو خو د هند چيف آف ډيفنس سټاف انيل چوهان دغه بيان مسترد کړېدے او وئيلي ئي دي چې د چين او پاکستان ترمينځ دفاعي تعاون خو موجود دے ولې دا ممکن نه ده چې چين نيغ په نيغه د پاکستان سره کومک کړي وي ۔دې نه مخکښې د هند واکمنو به دعوي کوله چې پاکستان د جوابي کارروائۍ دوران يوه هم الوتکه نه ده راګوزار کړې ولې وروستو په حکومتي واکمن د خپلو بيانونو نه په شا شوي وو او تصديق ئې کړېدے چې د فرانس نه درآمد کړي شوي رافيل الوتکې پاکستان په نښه کړې وې ۔
امريکې د هند دعوې مسترد کړېدي
د امريکې خارجه محکمې پاک هند تاؤ تريخوالې ختمولو کښې د صدر ټرمپ لخوا کردار نه ادا کولو په حواله د هند د واکمنو دعوې او بيانونه مسترد کړيدي ، ميډيا ته بريفنګ ورکولو په مهال د امريکې د خارجه محکمې ترجمانې ټيمي بروس وئيلي دي چې د صدر ټرمپ د مداخلت نه بغير د پاکستان او هند جهګړه نشوه ختميدې، ټيمي بروس وائي چې صدر ټرمپ څو وارې په دې حواله بيان ورکړيدے چې د دواړو ملکونو ترمينځ ئې جنګ بندي کړيده،د يوې پوښتنې په جواب کښې د خارجه محکمې وياندې ووئيل چې نائب صدر جے ډي وينس د پاکستان او هند ترمينځ د جنګ بندۍ مذاکراتو کښې شامل وو هند له د هغه کردار هم منل پکار دي ۔