چندیګړ: د هند په چندیګړ ښار کې د پنجاب د بهارتیا جناتا پارټي (بي جي پي) د دفتر مخې ته د لوړې کچې چاودنه شوې، چې راپورونه ښيي د سیک بېلتون غوښتونکي مشر سکه سنګ ببر یې مسؤلیت منلی، په داسې حال کې چې امنیتي ادارو خپلې پلټنې نورې هم ګړندۍ کړې دي
د هندي رسنیو له مخې، دا چاودنه د اپرېل په لومړۍ نېټه د مازیګر شاوخوا ۴:۴۵ بجې د سیکټر ۳۷ کې د روټري بلډ بانک دیوال ته نږدې، د بي جي پي دفتر ترڅنګ شوې ده. چاودنې نږدې موټرو ته زیان رسولی او په سیمه کې یې وېره خپره کړې، خو د مرګ ژوبلې راپور نه دی ورکړل شوی
فورینزک ټیمونه
له پېښې وروسته سمدستي پولیس، امنیتي ځواکونه او عدلي پلټنې ډلې (فورینزک ټیمونه) ځای ته ورسېدل. سیمه کلابنده شوه او د شواهدو راټولول پیل شول. لومړنۍ څېړنې ښيي چې ښایي دا د لاسي بم برید وي
د پلټنو پر مهال یو ویډیو هم مخې ته راغلې چې پکې دوه شکمن کسان د چاودنې ځای ته نږدې لیدل کېږي. پولیس د همدې ویډیو له لارې د هغوی د پېژندنې هڅه کوي
بلخوا، سکه سنګ ببر پر ټولنیزو رسنیو د یوې اعلامیې له لارې د برید مسؤلیت منلی او دا یې یو “پیغام” بللی. خو چارواکو لا تر اوسه دا ادعا نه ده تایید کړې او له بېلابېلو اړخونو پلټنې روانې دي
دا پېښه په داسې وخت کې شوې چې تر دې مخکې هم د بي جي پي مشران له ګواښونو سره مخ شوي وو. د ۲۰۲۴ کال په جولای کې یو شمېر مشرانو ته د ګواښ لیکونه او چاودېدونکي مواد لېږل شوي وو چې له امله یې قضیه ثبت شوې وه
اوس چارواکي دا هم څېړي چې ایا دا وروستۍ چاودنه له پخوانیو پېښو سره تړاو لري که نه، په داسې حال کې چې په چندیګړ او شاوخوا سیمو کې امنیتي حالت لوړ الرټ ته رسول شوی دی