پیښور: نن د چهارشنبې په ورځ د خیبر پښتونخوا په صوبایی اسمبلۍ غونډه کې د وزیراعلی خیبر پښتونخوا سهیل افریدي په مشرۍ کې د خیبر پښتونخوا امن لویه جرګه وشوه، د امن دې جرګې ګډون والو په شریکه یوه اعلامیه خپره کړې دې چې پکې غوښتنه شوې ده چې د پاکستان او افغانستان ترمنځ پوله دې په سمدستي ډول د سوداګریزو فعالیتونو لپاره پرانستل شي
د ترهګرۍ غندنه
د خیبر پښتونخوا امن جرګې په ګډه اعلامیه کې په صوبه کې د روانۍ ترهګرۍ په سختو ټکو کې غنده شوې ده او غوښتنه شوې چې د ترهګرۍ د ختمولو لپاره دې صوبایي اسمبلۍ په اعتماد کې واخیستل شي او د قانون په چوکاټ کې دې موجود ټول وسایل وکارول شي
په اعلامیه کې ویل شوي دي چې د امن او امان په اړه د صوبایي اسمبلۍ متفقه پرېکړو ، قراردادونو باندې دې په بیړني توګه عمل وشی، د کورني امنیت مشري به د پولیسو او سی ټي ډي په لاس کې وي ، په اعلامیه کې ویل شوي چې پولیس کولای شي د اړتیا په صورت کې د قانوني چوکاټ له مخې د نورو ادارو مرسته وغواړي
حکومتي مالي مرسته او د غیرقانوني پیسو اخستلو مخنیوې
حکومت به د امن او امان د خراب وضعیت له امله پولیسو او سي ټي ډي ته ځانګړې مالي مرسته ورکوي، د باج اخستنې او غیرقانوني محصولاتو د ختمولو لپاره دې یوه ګډه او منظمه تګلاره جوړه شي
د معدنیاتو غیرقانوني استخرا په اړه په اعلامیه کې ویل شوي چې په ناارامه سیمو کې دې د معدنیاتو غیرقانوني ایستلو ته د پای ټکی کښېښودل شي، صوبې ته دې د امنیتي ادارو د روانو عملیاتو او قانوني بنسټونو په اړه د ټاکلې مودې دننه “ان کیمره” بریفنګ ورکړل شي، د صوبایي کچې د امن فورمونه دې جوړ شي چې ډېری غړي یې غیر دولتي کسان وي.
د ښارونو په کچه دې د پولیسو، کنټونمنټ او بلدیاتي ادارو ترمنځ د همغږۍ لپاره د چیک پوسټونو د کمولو یا ختمولو پلانونه جوړ شي او د مقامي حکومتونو د ثبات او مالي خوندیتوب لپاره دې آئیني ترمیم وشي، د صوبایي فنانس کمیشن دې د ملي فنانس کمیشن سره وتړل شي.
د امن جرګه وړاندیز کوي چې صوبایي حکومت او اسمبلي دې د صوبې لپاره یو جامع “صوبایي ایکشن پلان” ترتیب کړي، د پاک-افغان پوله دې سمدستي د سوداګرۍ لپاره پرانستل شي. او د پاک-افغان خارجه پالیسۍ کې دې وفاقي حکومت له صوبایي حکومت سره مشوره وکړي.
د پاک-افغان شخړو د حل لپاره دې په ځانګړې توګه ډیپلوماسي او ډایلاګ ته پاملرنه وشی، امن جرګه سپارښتنه کوي چې د وفاقي او صوبایي حکومتونو ترمنځ تاوتریخوالی او اختلافات دې کم کړل شي او د مشترکه مفاداتو شورا غونډه دې د آئیني مودې ترمخه راوغوښتل شي
نورخبرونه: د پاکستان او افغانستان امن خبرو ملاتړي یو: وزیراعلی سهیل افریدي