پېښور: د خیبر پښتونخوا حکومت نن د امن او امنیتي وضعیت او د روانو امنیتي ننګونو په اړه یو مهم “امن جرګه” رابللې ده، چې د هغې لپاره ټول چمتووالی بشپړ شوی دی
دغه جرګه د خیبر پښتونخوا اسمبلۍ په تالار کې ترسره کیږی چې پکې د صوبې د ټولو لویو سیاسي، مذهبي، ټولنیزو او قبایلي مشران ګډون کوي تمه ده چې دا غونډه به د صوبې په تاریخ کې یو مهم پړاو ثابت شي
د سرچینو په وینا، د امن جرګې لپاره یو جامع امنیتي پلان جوړ شوی، او د اسمبلۍ په حدودو کې د غیر اړونده کسانو د داخلېدو بندیز لګول شوی دی، خو ګډونوالو ته ځانګړي پاسونه ورکړل شوي دي. په تالار کې د ۴۰۰ کسانو د ناستې ځای برابر شوی دی
د جرګې مشري به د اسمبلۍ سپيکر بابر سلیم سواتي کوي، او وزیر اعلیٰ سهیل آفریدي به د ځانګړي مېلمه په توګه ګډون کوي. د صوبایي حکومت په وینا، د جرګې له خوا د اتفاق په اساس جوړېدونکی اعلامیه به د مرکزی حکومت، امنیتي ادارو او ایپکس کمېټۍ ته لېږل کېږي، څو د هغې د سپارښتنو عملي کېدل یقیني شي
د سرچینو په خبره، جرګې ته د ۲۰ څخه زیات سیاسي ګوندونو استازي بلل شوي، چې پکې اې این پي، پاکستان پیپلز پارټي، مسلم لیګ (ن)، جمعیت علمای اسلام، جماعت اسلامي، قومي وطن پارټي او مسلم لیګ (ق) شامل دي.
سربېره پر دې، د خیبر پښتونخوا په دې جرګه کې د بار کونسل، وکیلانو، مدني ټولنې او دیني عالمانو استازي هم ګډون کوي
تمه ده چې د جرګې په ترڅ کې به شاوخوا ۴۰ ویناګانې وشي، چې پکې د سولې د ټينګښت، د ترهګرۍ پر ضد تګلاره، ایالتي همغږي، او د ولسي اعتماد د بیا رامنځته کولو په اړه خبرې وشي
د سرچینو له مخې، وزیر اعلیٰ سهیل آفریدي د مېلمنو هرکلی وکړ او له دوی سره یې یو په یو ستړي مشي وکړه. چیف سیکرټري شهـاب علي شاه او د پولیسو مشر ذوالفقار حمید هم په غونډه کې ګډون کوی
همدارنګه، پخواني ګورنران انجینر شوکت الله، شاه فرمان، نامتو عالم مولانا محمد طیب پنچ پیر، او د مفتی منیر شاکر زوی عبدالله شاکر هم د ګډون کوونکو څخه دي
په ګډونوالو کې مشهور خبریالان حامد میر، امتیاز ګل او نور د مطبوعاتو استازې هم ګډون کوي، چې تمه ده د سولې د پیغام د پیاوړتیا لپاره خپل نظر وړاندې کړي
کارپوهان وايي، دا جرګه په داسې وخت کې رابلل شوې ده، چې صوبه د ترهګرۍ له ګواښونو، د پولې له ترینګلتیا او د داخلي امنیتي ستونزو سره مخ ده
سیاسي څېړونکي باور لري که د جرګې نه یو متفق لائحۀ عمل راووځي، نو دا به د خیبر پښتونخوا لپاره د یوې نوې لارې ټاکنه وي