د آزاد کشمير په پلازمېنه مظفرآباد کې د حکومت او ولسي اېکشن کمېټې استازو په ګډه خبري غونډه کې د هوکړې اعلان وکړ.
د وزيراعظم سلاکار او د حکومتي مذاکراتي کمېټې غړي رانا ثناءالله په خبري غونډه کې وويل چې دا موضوع په ښه ډول حل شوه او د ولسي اېکشن کمېټې جايز غوښتنې ومنل شوې.
ده زياته کړه چې د دواړو لورو د موضوعاتو د هوارولو لپاره يوه قانوني اېکشن کمېټه جوړه شوې ده، دا کمېټه به هر پنځلس ورځې وروسته غونډه کوي.
د پېپلز ګوند مشر او پخواني وزيراعظم راجه پروېز اشرف وويل چې ځينې خلکو غوښتل ګډوډي جوړه کړي او حالات خراب کړي خو د هغوی ټول پلانونه ناکام شول
راجہ پروېز اشرف زياته کړه چې په کشمير کې د امن راوستل د ټولو ګډه ذمه واري ده. يوه کمېټه جوړه شوې ده او اوس هېچا ته اړتيا نشته چې سړکونو ته راووځي. که ستونزه يا شکايت وي، بايد د کمېټې مخې ته ی وړاندې کړي. .
وفاقي وزير احسن اقبال هم د ګډې اېکشن کمېټې سره هوکړه د پاکستان، آزاد کشمير او ديموکراسۍ بريا وبلله.
احسن اقبال د حکومتي مذاکراتي کمېټې د خبري غونډې نه وړاندې په ټولنيزو رسنيو کې په خپل پيغام کې ويلي وو چې په تېرو اوونيو کې د ولسي ستونزو له امله يوه سخته وضعه رامنځته شوې وه، خو د ځايي او ملي مشرتابه د پوهې او د خبرو اترو روحيې له لارې دا کړکېچ په سوله ييز ډول حل شو.
ده وويل: نه تشدد ته لاره ورکړل شوه او نه وېش، بلکې د متقابل احترام او مکالمې په برکت يو حل راوووت.
وفاقي وزير زياته کړه چې ګډې اېکشن کمېټې د ولس غږ پورته کړ او د وزيراعظم شهباز شريف په مشرۍ حکومت په جدي توګه دغه غږ واورېد. کله چې حکومت د ولس خبره اوري، ولس هم په رغنده ډول خبرې کوي او حل ته لاره پيدا کېږي. احسن اقبال وويل: موږ د ټکر پر ځای مشورې او د انا پر ځای يووالي ته لومړيتوب ورکړ. ان شاءالله ټول به يو ځای د آزاد جمون و کشمير د ښه حکومتدارۍ او پرمختګ لپاره ګډ کار کوو
