په خیبر پښتونخوا کې د امنیتي ځواکونو په وروستۍ عملیاتو کې وژل شوو ترهګرو له ډلې یو د بنګله دېش تبعه هم پېژندل شوی دی. دا عملیات د لکي مروت او کرک په سیمو کې د سپتمبر په ۲۶ او ۲۷ نېټه ترسره شول، چې پکې د پاکستان پوځ، سپېشل سروسز ګروپ او د ترهګرۍ ضد څانګې سي ټي دي برخه اخستې وه
د پوځ ویاندې ادارې آیی ایس پي ار په وینا د درشه خیل په سیمه کې د استخباراتي معلوماتو په اساس ترسره شوي عملیاتو کې د هند ملاتړ لرونکې د ملا نذیر د ډلې ۱۷ ترهګر اووژل شول او تر لسو پورې ترهګر ټپيان شول، وژل شوي ترهګر په یو شمیر ترهګریز بریدونو کې ککړ وو او د هیواد په بیله بیلو سیمو کې ی د نامنۍ خپرولو هڅې کولې.
د څېړنو پر مهال څرګنده شوه چې وژل شوو کسانو له ډلې یو بهرنی وګړی هم دی چې د بنګله دېش تبعه و. د هغه له قبضې څخه د بنګله دېش پېژندپاڼه، کرنسي او نور شخصي توکي ترلاسه شوي دي.
استخباراتي سرچینو ویلي چې له دې وړاندې هم په بېلابېلو عملیاتو کې ۲ تر ۳ پورې د بنګله دېش وګړي وژل شوي وو. دغه کسان په ظاهره د تبلیغي فعالیتونو لپاره افغانستان ته تللي وو، خو هلته د تندلارو ډلو له خوا خپلو شبکو ته جذب شوي وو.
بل لور ته ځینې غیر تایید شوي راپورونه وایي چې وژل شوی بنګله دېشی ښایي د انصار فی الہند الشرقیه ډلې غړی وي. دا یوه بنده شوې ډله ده چې د القاعده او تحریک طالبان پاکستان سره تړاو لري. تېر کال هم داسې راپورونه ورکړل شوي وو چې د دې ډلې غړي افغانستان کې موجود دي او د شمالي وزیرستان سیمې ته د ننوتو پر مهال وژل شوي وو. چارواکي وایي، د بنګله دېشي ترهګر د وژل کېدو د تایید وروسته به د پاکستان او بنګله دېش ترمنځ د استخباراتي همکارۍ پراختیا اړینه شي، څو دغه سرحدي شبکه ماته شي
نورخبرونه
پاکستان کښې ترهګري: د داعش خراسان ډلې مشر په افغانستان کې اووژل شو