داعش خراسان ډلې لپاره لوئې زيان نامعلومه بريد ګرو د افغانستان مزار شريف ښار کښې د دې ډلې مهم کمانډر احساني چې په انوار نوم هم پيژندل کيدو په ډزو وژلي دے ۔ وژلې شوي ترهه ګر پاکستان کښې د بدامنۍ په مختلف پيښو کښې ککړتيا لرله ۔ د احساني عرف انوار په بابله وئيلي کيږي چې هغه د نسل نه تاجک دے ،هغه به پاکستان ته د چاودنو لپاره ځانمرګي بريد ګر استول او د ترهه ګرو د تربيت ذمه واري د هغه په سر وه ۔ د داعش کمانډر درې کاله مخکښې د پيښور قصه خوانۍ بازار په کوچه رسالدار جومات باندې شوي د ځانمرګي چاودنه کښې د پاکستان سيکيورټي ادارو لخوا مهم سهولت کار نامزد کړي شوي وو۔ د پيښور په دې چاودنه کښې ۶۷ کسان شهيد او ۱۹۴ ټپيان شوي وو ۔
افغانستان اوس هم د ترهه ګرو لوئې مرکز دے
سرچينو ترمخه تاجکستان سره تعلق لرونکې يو بل خود کش بريد ګر هم د انټلي جنس اطلاعاتو په بنياد يوې کارروائۍ دوران په افغانستان کښې وژلې شوېدے،دې بريد ګر پيښور کښې د عيسانو کليسه باندې د حملې منصوبه لرله ۔ د داعش ډلې مهم کمانډرانو وژنه د دې تنظيم لپاره لوئې زيان دے ۔ ياده دې وي چې افغانستان کښې ميشته داعش ډله په خېبرپښتونخوا او په خصوصي توګه کوئټه او د ملک نورو ښارونوکښې د شيعه ګانو په جوماتونو،امام باړو او نور مقاماتو باندې حملو کښې ککړ ده او دې ډلې د بريدونو ذمه واري هم قبول کړيده ۔ د داعش دوه مهم جنګيالي په داسې مهال افغانستان کښې وژل کيږي چې افغان دولت دعوي لري چې دې هيواد کښې ئې داعش ډله ډيره ځپلې ده، د دې تنظيم مهم کمانډران وژلي شوي يا جيلونو کښې بنديوان کړي شويدي ولې د پاکستان بشمول د افغانستان ټول ګاونډي هيوادونه انديښنې لري چې د افغانستان خاوره اوس هم د نړي وال ترهه ګرو لپاره خوندي ځائې دے چې ورته د اسلامي امارت ملاټر هم ترلاسه دے دغه رنګ د متحده قامونو سلامتي کونسل هم خپل يو راپور کښې وئيلي وو چې د پاکستان د کالعدم تنظيمونو،داعش،القاعده او نور ترهه ګر ډلو په سوؤنو جنګيالي په افغانستان کښې ميشته دي کوم چې د منطقې بشمول ټولې نړۍ لپاره لوئې ګواښ دے او افغان دولت څخه ئې د دې ډلو په ضد موثره او فوري کارروائۍ مطالبه هم کړېده ۔
نورخبرونه