د چين په تيانجن ښار کښې شوي د شنګهائي تعاون تنظيم ۲۵ سرمشيره غونډې اعلاميه جاري شويده چې پکښې د ترهه ګرۍ د مخنيوي په حواله د پاکستان د موقف او تجويزونو توثيق شوېدے،اعلاميې ترمخه ترهه ګرۍ خلاف جنګ کښې بغير د څه فرق کارروائي کول پکار دي،اعلاميه کښې وئيلي شويدي چې د پولو يو خوا بلخوا د ترهه ګرو تګ راتګ د مخنيوي لپاره بايد چې د متحده قامونو د سيکيورټي کونسل د قراردادونو او د ترهه ګرۍ د مخ نيوي نړي والې تګ لارې مطابق د ټول ترهه ګرو او د دوي د تنظيمونو خلاف موثره کارروائي وکړې شي ۔ اعلاميه کښې په دې خبره زور راوړلې شوېدے چې د تنظيم هر ملک دې شرخوښي عناصر او ترهه ګر ګروپونه د سياسي مقصد لپاره استعمالولو نه ډډه وکړي ،اعلاميه کښې زياته کړي شويده چې پاکستان د خپل پولود هغې اړخ نه د ترهه ګرو د سهولت کارۍ ثبوتونه او شواهدوخت په وخت نړۍ ته په ډاګه کوي او نړۍ د پاکستان دغه تحفظات او شواهد تسليم کړې هم دي ۔ د ايس سي او په اعلاميه کښې په يوؤلسم مارچ د بلوچستان په سبي علاقه کښې پيښور ته تلونکي جعفر ايکسپريس ټرين باندې د کالعدم بي ايل اے او مجيد بريګيډ د ترهه ګرو د حملې او په يويشم مئي خضدار کښې د سکول د طالب علمانو په بس د بم حملې مذمت شوېدے ۔ په دې اعلاميه کښې پرامن افغانستان د منطقې ملکونو لپاره ضروري ګرځولې شوېدے او افغانستان کښې ټولو ګوندونو باندې مشتمل حکومت د قائمولو مطالبه ئې کړيده ۔اعلاميې کښې وئيلي شويدي چې افغانستان کښې د پائيدار امن او استحکام لپاره ضروري ده چې حکومت کښې دې ټول نسلونو سره تعلق لرونکي کسان او د سياسي ډلو نمائندګان هم شامل وي، ايس سي او تنظيم د افغانستان سلامتيا او څوکالۍ لپاره د نړي وال کوششونو مکمل ملاټر کولو د عزم اظهار هم کړېدے ۔ د اعلاميې ترمخه د ترهه ګرۍ او سخت دريزې خلاف مشترکه کوششونه کولو باندې د تنظيم ټولو ملکونو اتفاق کړېدے او د سيکيورټي چيلنجونو او د سمګلنګ د مخنيوي لپاره يونيورسل او انټي ډرګ سنټرې د جوړولو په معاهدو لاس ليک شوېدے ۔