د متحده عرب امارات په کوربه توب د پاکستان،عرب امارات او افغانستان کرکټ ټيمونو ترمينځ سه فريقي ټورنمنټ باقاعده آغاز ،د ټورنمنټ وړومبې ميچ د پاکستان او افغانستان ټيمونو ترمينځ دے ،ميچ د پاکستان د وخت مطابق ماسخوتن اته بجے شارجه ګراونډ باندې لوبيږي ۔
د دې ټورنمنټ د ټرافۍ د مخ کتنې دستوره تيره ورځ شوي وه چې پکښې د درې واړو ټيمونو کپتانانو او د ټورنمنټ منتظمينو ګډون کړي وو، د ټرافۍ د مخ کتنې دستورې وروستو د پاکستاني ټيم کپتان سلمان علي آغا،د افغانستان د ټيم کپتان راشد خان او د متحده عرب امارات د ټيم کپتان محمد وسيم پريس کانفرنس ته وينا هم کړي وه،د درې واړو ټيمونو کپتانانو دا ټرافي په خپل نوم کولو د عزم اظهار کړې او وئيلي ئي وو چې لوبغاړي به ټائټل په خپل نوم کولو هر ممکن کوشش کوي ۔
کرکټ مينه وال دې ماحول خرابولو نه ډډه وکړي،راشد خان
د افغانستان کرکټ ټيم کپتان راشدخان ميچ لپاره ګراونډ ته راتلونکي افغانانو ته اپيل کړېدے چې د ميچ دوران دې څه قسمه بدنظمي پيدا کولو، جنګ جهګړه کولو يا ماحول خرابولو نه ډډه وکړي ، شارجه کښې پريس کانفرنس ته وينا په مهال راشد خان وئيلي دي چې لوبه کښې خو بيلات او ګټه خامخا د يو ټيم وي خو د کرکټ مينه والو ته اپيل کوؤ چې د ميچ نه دې خوند پورته کړي او هيڅ قسم هنګامه دې نه کوي ۔ راشد خان وائي چې لوبې او ټورنمنټونه خلکو کښې اتفاق پيدا کوي او ملکونه يو بل ته رانزدې کوي د کرکټ مينه وال دې په شوق سره ګراونډ ته راشي او د خپل خوښې لوبغاړي دې سپورټ کړي ۔ په شارجه ګراونډ باندې ستمبر مياشت ۲۰۲۲ کښې د پاکستان او افغانستان د ميچ ختميدو نه پس په ګراونډ کښې موجود افغانانو هنګامه کړې وه،کرسۍ ئې ماتې کړې وې او نور ورانې ئې کړې وو،دا ميچ پاکستان ګټلې وو،په سه فريقي ټورنمنټ کښې د پاکستانيانو او افغانانو ترمينځ د څه قسمه تاؤ تريخوالې پيدا کيدو او ميچ دوران ماحول د خرابولو نه بچ کولو لپاره د ټورنمنټ منتظمينو د سيکيورټۍ سخت انتظامات پورته کړيدي،د دواړو ملکونو د کرکټ مينه والو لپاره په ګراونډ کښې د ناستې لپاره بيل بيل ځايونه مختص کړي شويدي ۔