اسلاماباد: د افغانستان د بهرنیو چارو وزیر امیر خان متقي به سبا اګست له ۴مې تر ۶مې نېټې پاکستان ته سفر وکړي
په دې سفر کې به نوموړی د پاکستان د کورنیو چارو وزیر محسن نقوي او نورو مهمو سیاسي او پوځي مشرانو سره وګوري. دا سفر د دواړو هېوادونو ترمنځ د زیات رانزدې کیدلو څرګندونه کوي، ځکه څو ورځې وړاندې د پاکستان د کورنیو چارو وزیر محسن نقوي، د بهرنیو چارو وزیر اسحاق ډار او نور لوړپوړي چارواکي کابل ته تللي وو، او اوس د افغان حکومت یو مهم لوړ پوړې چارواکې اسلاماباد ته راځي.
دلته ددې خبرې باید یادونه وشي چې د دواړو مسلمان ګاونډي هیوادونو د لوړپوړه چارواکو پلاوي یو بل هیواد ته دا سفرونه ښایی چې دواړه ورور هېوادونه پاکستان او افغانستان د دوه اړخیزه تجارت او اړیکو د پیاوړتیا په لور روان دي او دواړه ګاونډي هیودونه غواړي چې یو بل ته رانزدې شي . .
تمه کېږي چې امیر خان متقي به د پاکستان له وزیراعظم شهباز شریف او نورو مهمو سیاسي او پوځي چارواکو سره هم ملاقاتونه وکړي.
د چارو کارپوهان وايي، تمه ده چې د دې سفر پر مهال به د دواړو هېوادونو ترمنځ د سوداګرۍ پر مهال پر سرحدي مشکلاتو لکه د ګمرک ستونزو او یو شمیر نور مهمو موضوع ګانو باندې بحث وشي..
څو ورځې وړاندې د محسن نقوي او اسحاق ډار د افغانستان سفر او اوس د افغان بهرنیو چارو وزیر امیر متقي د پاکستان سفر دا څرګندوي چې افغان چارواکي د ترهګرۍ، په ځانګړي ډول د تحریک طالبا
پر ضد د سرحدي سیمو له کارونې جدي اندېښنه لري او غواړي چې په دې اړه ګامونه پورته کړي
دا سفر نه یوازې د دواړو هېوادونو ترمنځ د تجارت او اړیکو لپاره د امید څرک وړاندې کوي، بلکې د سیمې د ثبات او امن، او په ځانګړې توګه د پاک–افغان سرحد په اوږدو کې د روانې ترهګرۍ پر وړاندې دواړه هېوادونه د ګډ او څرګند دریځ خپلولو ته هڅوي او د ترهګرۍ په ضد د عملي ګامونه اخیستلو تمه کېږي.
د افغان کډوالو په ستونزه د پرمختګ تمه ده
په وروستیو وختونو کې د افغان کډوالو موضوع یوه نړیواله مسئله ګرځېدلې ده. یو طرف ته د پاکستان او ایران د کډوالو اړوند پالیسۍ، او بل لور ته د افغان حکومت د امکاناتو کمښت له امله یې افغان کډوال له سختو ستونزو سره مخامخ دي. د کډوالو او افغان حکومت ټول شرایط په پام کې نیولو سره، د امیر خان متقي سفر د دې له پلوه هم ډېر مهم ګڼل کېږي، ځکه تمه ده چې د ترهګرۍ پر ضد د خبرو تر څنګ، د افغان کډوالو پر موضوع هم د ګاونډیو هېوادونو ترمنځ ناستې وشي. دا هڅه به دا یقیني کړي چې نه د پاکستان او افغانستان اړیکې زیانمن شي، او نه هم کډوال له نورو کړاوونو سره مخ شي.
د پاکستان په سرحدي سیمو کښې امنیتي وضع خرابه ده
دلته ددې خبرې هم باید یادونه وشي چې افغان وزیر خارجه په داسې وخت کې پاکستان ته راځي چې د افغانستان سره په سرحدي سیمو کښې د ټي ټي پي وسله وال د پاکستان امنیتي ځواکونو په ضد د ترهګرۍ پیښو کې ککړ دي. بل لور ته په باجوړ کې د وسله والو په ضد د سربکف عملیات هم ترسره شول چې پکې یو شمیر ترهګر له منځه یوړل شول خو د ځآیی مشرانو جرګه هم د ټي ټي پي وسله والو سره خبرې اترې کوي.
د جرګې مشرانو له مخه طالبانو دوی ته ویلي چې دوی به خپله خاوره نه پریږدي او دا ی هم ورته څرګنده کړې ده چې امنیتي ځواکنو که دوی په هدف و نه ګرځوي نو وسله وال به هم په امنیتي ځواکونو بریدونه پای ته ورسوي.
د خیبر په وادي تیراه کې هم د مشرانو جرګې ټي ټي پي مشرانو سره لیدلي خو هغوی هم د جرګې څخه مهلت غوښتې چې دوی به د مشرانو جرګې ته ځواب ورکړي