د فلسطين او اسرائيل ترمينځ جنګ بندۍ لپاره په نړي وال کچ کوششونه جاري دي خو بيا هم اسرائيلي پوځ غزه کښې بريدونه سيوا کړيدي او مختلف سيمو باندې ئې تازه حملو کښې يو اتيا فلسطنيان شهيد کړيدي ، دا حملې په رهائشي سيمو او د بے کوره شوي کسانو په مرکزونو شويدي ۔
فلسطين صحت محکمې چارواکي وائي چې د اسرائيلي جارحيت دوران پنځلس مياشتو کښې د 62 شپيته زرو نه سيوا فلسطنيان مړه شويدي چې پکښې دوه سوه خبريالان هم شامل دي ۔ د مصر او قطر په کوششونو دوحه کښې د حماس او اسرائيل ترمينځ جنګ بندۍ معاهدې ته رسيدو لپاره درې ګهنټو مذاکرات شوي وو ولې څه فيصله پکښې نه ده شوے،د حماس چارواکي وائي چې د اسرائيل وفد د جنګ بندۍ د ممکنه معاهدې په حواله څه اختيار نه لري نو په داسې حالاتو کښې د خبرو دا سلسله څنګ کاميابيدې شي ۔ دې نه مخکښې هم قطر او مصر دا قسمه کوششونه کړي وو ولې د فريقينو د رويو لوجې پکښې څه خاص پرمختګ نه دې شوے ۔
د فلسطين د شخړې په حواله واشنګټن کښې د صدر ډونلډ ټرمپ او اسرائيلي وزيراعظم نتن ياهو ترمينځ مهم ملاقات کيږي ۔ د ملاقات نه مخکښې خپل يو بيان کښې نتن ياهو وئيلي دي چې صدر ټرمپ د غزه جنګ بندولې شي او هغه سره واشنګنټن کښې د ليدنې په مهال به په دې حواله څه نه څه مثبت نتائج رامخې ته شي ، بلخوا امريکني صدر ټرمپ امکان څرګند کړېدے چې هم دې هفته کښې به د حماس او اسرائيل معاهده اوشي او جنګ به بند شي ۔ برکس تنظيم غزه د مقبوضه فلسطين برخه ګرځولي ده او د فلسطين د مسئلې دوه رياستي حل لپاره ئې د فلسطين حکومت ملاټر جاري ساتلو عزم کړېدے، برازيل کښې شوي د برکس تنظيم سرمشريزه غونډې اعلاميه کښې په غزه کښې د فوري جنګ بندۍ مطالبه شويده، اعلاميه کښې په ايران د اسرائيل د حملو هم مذمت شوې وو ۔