نېټه: ۲۱ جون ۲۰۲۵
د ضلع صوابۍ د ټوپي تحصیل د انډسټریئل پولیسو وینا ده چې د پولیسو اهلکاران په بازار کې د خوړو لپاره ناست وو چې نامعلومو کسانو پرې ناڅاپي ډزې وکړې. د پولیسو په وینا، کانسټیبل جمال الدین او ډرایور زاهد پر ځای شهیدان شول، او برید کوونکي له سیمې تښتي. د پېښې ذمه واري تر اوسه چا نه ده منلې.
د پېښې له راپور سره سم، د پولیسو درنه نفري موقعې ته ورسېده، سیمه يې کلابنده کړه او لټون عملیات يې پیل کړل. د ضلعې د پولیسو مشرانو ویلي چې د شهیدانو قربانۍ به هسې نه شي، او ژر به برید کوونکي د قانون منګولو ته وسپارل شي. د شهیدانو مړي تر قانوني کارروايۍ وروسته خپلو خپلو پلرنیو سیمو ته ولېږدول شول.
د پېښې په تړاو په انډسټریئل تاڼه کې د نامعلومو کسانو پر ضد مقدمه درج شوې ده.
دوهمه پېښه د مردان په کاټلنګ بابوزئی غرنیزه سیمه کې شوې، چیرې چې نامعلومو وسله والو په څلورو کسانو ډزې وکړې او ټول يې ووژل. د روغتون سرچینو له مخې، وژل شوي کسانو کې درې د امنیتي ادارو اهلکاران او یو ځايي اوسېدونکی شامل دی.
سرچینې وایي چې وژل شوی ځايي کس، حماد غفور، د پخواني د قامي اسمبلۍ امیدوار عنایت خان کزن و، چې په بابوزئی کې يې د کرش پلانټ خاوندی درلود. نور کسان د هغه مېلمانه وو. ویل کېږي چې دغه کسان برید نه مخکې یوې ورځې نامعلومو کسانو تښتولي وو.
د وژل شوو کسانو مړي سمدستي روغتون ته ولېږدول شول، او پولیسو او امنیتي ادارو سیمه کلابنده کړه او د پېښې پلټنې يې پیل کړې دي. چارواکي وایي چې د پېښې نوعیت او لاملونه معلومولو لپاره پلټنې دوام لري
