د پاکسان سفارتي پلاوي مشر ،د پاکستان پیپلزپارټۍ مشر او د پاکستان پخواني بهرنیو چارو وزیر بلاول بوټو زرداري ویلي دي چې د هند سره د ټولو ستونزو حل د کشمیر ستونزې سره تړلې دې،هغه اووېل هند سره پر اوبو به هېڅ ډول جوړجاړی ونه شي.
نوموړي دا څرګندونې له یوې بهرنۍ ټلوېزیوني شبکې سره د مرکې پر مهال وکړې. بلاول بوټو زرداري وویل، پاکستان یو ذمه وار اټومي ریاست دې او د هند یرغل ې په کلکه غندنه کړې ده. هغه زیاته کړه چې د هند له لوري د سند طاس تړون ځنډول د نړیوالو قوانینو ښکاره سرغړونه ده.
نوموړي وویل، پاکستان دا خبره روښانه کړې چې د اوبو بندول به د جګړې اعلان وبلل شي. اوبه زمونږ یوه نه جلا کېدونکې اړتیا ده، او پر دې هېڅ جوړجاړی نه کېږي. هند نه شي کولای چې د سند طاس تړون یو طرفه وځنډوي یا ختم یې کړي.
بلاول بوټو زیاته کړه چې پاکستان یو سوله غوښتونکی هېواد دی، او تل یې د خبرو اترو او ډیپلوماسۍ له لارې د ستونزو د هواري ملاتړ کړی دی. نوموړي وویل، هند ناسم معلومات او پروپاګنډ خپروي، او د پهلګام پېښه یې له کوم ثبوت پرته پر پاکستان تپلې ده.
نوموړي دا هم وویل چې پاکستان غواړي د کشمیر، اوبو او نورو موضوعاتو په اړه خبرې اترې وشي.هغه زېاته کړه چې هند سره د ټولو ستونزو حل د کشمیر ستونزې سره تړلې . پاکستان او هند د ډز بندۍ اعلان کړی، خو لا سوله نه ده راغلې. بلاول بوټو وویل چې د امريکا ولسمشر ډونلډ ټرمپ د اوربند په برخه کې کردار د ستاینې وړ دی.